ඉර්ෆාන් අන්සාරිගේ පුහුණුකාරිත්වය තාවකාලිකව අත්හිටුවයි

පසුගිය වසරේ ඔක්තෝබර් මාසයේ දී ශ්‍රී ලංකාව හා පාකිස්තානය අතර එක්සත් අරාබි එමීර් රාජ්‍යයේ දී පැවති එක්දින ක්‍රිකට් තරගාවලිය අතරතුර පාකිස්තානු කණ්ඩායමේ නායක සෆ්රාස් අහමඩ් හට තරග පාවාදීමකට අනුබල දීමක් සිදු කරනු ලැබීම නිසා ඉර්ෆාන් අන්සාරි හට දඬුවම් ලකුණු 3ක් ලබා දීමට ජාත්‍යන්තර ක්‍රිකට් කවුන්සිලය තීරණය කර ඇත.

පාකිස්තානු පුරවැසියෙකු වන මොහු එක්සත් අරාබි එමීර් රාජ්‍යයේ දේශීය ක්‍රිකට් කණ්ඩායම් කිහිපයක පුහුණුකරුවෙකු ලෙසත් ක්‍රීඩා සමාජ කිහිපයකම ප්‍රධාන පුහුණුකරු ලෙස මේ දක්වාම කටයුතු කර ඇති නමුත් ඊයේ (10) සිට එම පුහුණුකාරිත්වය තාවකාලිකව අත්හිටුවීමට ජාත්‍යන්තර ක්‍රිකට් කවුන්සිලය තීරණය කර තිබේ.

අන්සාරී ජාත්‍යන්තර ක්‍රිකට් නීති හා රීති වල තිබෙන දූෂණ අක්‍රමිකතා ඇතුළත් නීතිමය රාමුවේ 2.3.2, 2.3.3 හා 2.4.6 යන වගන්ති තුනක් මූලික වශයෙන් කඩකර ඇති බව පාකිස්තානු ක්‍රිකට් පාලක මණ්ඩලය කළ දැනුම් දීමකට අනුව දැනට පවත්වා තිබෙන පරීක්ෂණ වලින් අනාවරණය වී තිබේ.

උක්ත සිදුවීම සිදු වූ දිනයේ දී ම (අබුඩාබි හිදී පැවති එක්දින තරගයේ) පාකිස්තානු ක්‍රිකට් කණ්ඩායම් නායකයා වන සෆ්රාස් අහමඩ්, අන්සාරී විසින් කළ යෝජනාව වහාම ප්‍රතික්ෂේප කරමින් සිය කණ්ඩායමේ කළමනාකරු ඇතුළු ක්‍රිකට් පාලක මණ්ඩලයේ නිලධාරීන් වෙත එම සිදුවීම පිළිබඳව එසැනින්ම දැනුම් දී තිබේ.

මැයි මස 19 වැනිදා සිට දින 14ක් ඇතුළත ජාත්‍යන්තර ක්‍රිකට් කවුන්සිලය විසින් පවත්වනු ලබන පරීක්ෂණයට ඉර්ෆාන් අන්සාරී විසින් කරුණු දැක්විය යුතු අතර අනතුරුව ඔහු පිළිබඳව ඉදිරි තීරණයක් ගනු ලබයි.

 

 

Leave a Reply

Your email address will not be published. Required fields are marked *