එළු මස් බුරියානි වලට බලු මස් සැපයු පුද්ගලයන් කොටුවෙයි.

ඉන්දියාවේ චෙන්නායි නුවරදී අද(17) බලු මස් කිළෝ ග්‍රෑම් දහසක් සමග පොලීසිය විසින් අත් අඩංගුවට ගෙන ඇති සැකකරුවන් දෙදෙනාගෙන් එක් අයෙකු යාපනයේ කරවෙඩ් ප්‍රදේශයේ පදිංචි කරුවකු බවට තොරතුරු හෙලිවී තිබේ.

මේ දෙදෙනා අත්අඩංගුවට පත්ව ඇත්තේ ඉන්දියාවේ චෙන්නායි නුවර ජායිපූර් දුම් රිය ස්ථානය අසලදීය. පොලීසියට ලැබුණු තොරතුරක් මත මේ දෙදෙනා අත්අඩංගුවට ගෙන ප්‍රශ්න කළ අවස්ථාවේදී ඔවුන් පොලීසියට පවසා ඇත්තේ ඔවුන් සේවය කරණ ආපන ශාලාවේ එළු මස් බුරියානි සදහා ඔවුන් එළු මස් රැගෙන යන බවයි.

පොලීසිය දිගින් දිගටම කළ ප්‍රශ්න කිරීම් වලදී ඔවුන් රැගෙන යන්නේ බලු මස් බව අනාවරණය වී තිබේ.

ඔවුන් අත් අඩංගුවට ගන්නා ලද අවස්ථාවේදී ඔවුන් දෙදෙනා ළග බලුමස් කිලෝ ග්‍රෑම් 150 ක් තිබී ඇති අතර ඔවුන් දෙදෙනා සේවය කරණ ආපන ශාලාව පරීක්ෂා කිරීමේදී ශීතකරණ වල දමා තිබූ තවත් බලුමස් කිලෝ 850 ක් පොලීසියට හමු වී තිබේ.

ඉන්දියාවේ රාජස්ථාන් පළාතෙ ;එළුමස් බුරියානී; නමින්ම පවත්වා ගෙන යන ආපන ශාලාවක එළුමස් බව පවසමින් බලුමස් යොදාගෙන කාලයක සිට මේ ජාවාරම කරගෙන යන බව පොලීසිය විසින්

අනාවරණය කරගෙන තිබේ.

බලුමස් සමග අත් අඩංගුවට ගත් සේවකයින් දෙදෙනා එක් ස්ථානයකින් බලු මස් රැගෙන දුම්රියෙන් අදාල ආපන ශාලාව වෙත මස් ප්‍රවාහනය කිරීමට සූදානම් වූ අවස්ථාවේදී ඔවුන්ව පොලීසියට කොටු වී තිබේ. මේ ආරංචිය ලැබීමත් සමගම ආපන ශාලාවේ හිමිකරු ආපන ශාලාවෙන් පැන ගොස් ඇති අතර චෙන්නායි පොලීසිය ඔහුව අත්අඩංගුවට ගැනීමට පරීක්ෂණ ආරම්භ කොට තිබේ.

 

 

පුරාවිද්‍යා නිලධාරීන් පිරිසකට හින්දු පූජකවරු පිරිසක් හා ගම්වාසීන් එක්ව පහර දීමට යයි

වවුනියාවේ සමලන්කුලම පුරාවිද්‍යා ස්ථානය නිරීක්ෂණය කිරීමට ගිය පුරාවිද්‍යා නිලධාරීන් පිරිසකට එම ස්ථානය බලහත්කාරයෙන් අල්ලා ගෙන සිටින හින්දු පූජකවරු පිරිසක් හා ගම්වාසීන් එක්ව ඊයේ(16) පහර දීමට උත්සහ කොට තිබේ.

වවුනියාවේ සමලන්කුලම පුරාවිද්‍යා ස්ථානය බෞද්ධ සිද්ධස්ථානයකි. යුද සමයේදී නිලධාරීන්ට එම ප්‍රදේශයට යාමට

නොහැකි වූ නිසා හින්දු පිරිසක් එම ස්ථානය බලහත්කාරයෙන් අල්ලාගෙන හින්දු කෝවිලක් ඉදිකොට ඇත්තේ 1985 වසරේදීය.

පසුගිය නොවැම්බර් 3 දා දෙමළ ජාතික සන්ධානයේ දේශපාලනඥයින් පිරිසක් මේ ස්ථානයට පැමිණ කෝවිල සංවර්ධනය කිරීම සදහා මුදල් ආධාර සපයා දීමත් සමගම කෝවිලේ කටයුතු සංවර්ධනය කිරීමට ඉපැරණි බෞද්ධ නටබුන් කඩා ඉවත් කොට තිබේ.

කඩා ඉවත් කරණ ලද ස්ථානයේ නව ඉදිකිරීම් සිදු කිරීමට ගඩොල් වැලි ඇතුළු දේ රැගෙන විත් තිබේ. සමලන්කුලම පුරා විද්‍යා ස්ථානයේ ඉපැරණි දාගැබක් හා නටබුන් පිහිටා ඇති අතර ඒවා විනාශ කොට ඇති බවට පුරා විද්‍යා නිලධාරීන්ට ලැබුණු තොරතුරක් මත එය නිරීක්ෂණය කිරීමට ගිය අවස්ථාවේදී හින්දු පූජකවරු හා ගම්වැසියෝ එක්ව නිලධාරීන්ට පහර දීමට උත්සහ කොට ඔවුන්ව එම ස්ථානයෙන් එළවා දමා තිබේ.

 

 

අධික වේගය නිසා ජිවිතයට සමුදුන් පාසල් සිසුවා

මුලතිව් මුරුකන්ඩි ප්‍රදේශයේදී අද(17) දහවල් සිදු වූ රිය අනතුරකින් එකොළොස් හැවිරිදි පාසල් ශිෂ්‍යයෙකු තුවාල ලබා කිළිනොච්චිය රෝහලට ඇතුළත් කොට තිබේ.

මෙම ශිෂ්‍යයා ත්‍රී රෝද රථයක ගමන් කරමින් සිටියදී එම ත්‍රී රෝද රථය මෝටර් රථයක ගැටීමෙන් මෙම අනතුර සිදුව තිබේ.

අනතුරින් තුවාල ලැබූ ශිෂ්‍යයාගේ තත්ත්වය බරපතල බව කිළිනොච්චිය රෝහලේ වෛද්‍යවරු කියා සිටියහ. මෝටර් රථය අධික වේගයෙන් ධාවනය කරවීම හා නිසි ලෙස සංඥා නොදැමීම මේම අනතුරට හේතුව බව අනාවරණය වී තිබේ.

මාන්කුලම් පොලීසිය සිද්ධිය පිළිබදව පරීක්ෂණ පවත්වා ගෙන යයි.

 

 

රිය අනතුරින් තරුණයෙකු මරුට

බකමූණ, ඇලහැර – හෙට්ටිපොල මාර්ගයේ සිදුවු අනතුරකින් තරුණයෙකු මියගොස් තිබේ.

පොලිසිය පැවසුවේ යතුරුපැදියක් පැදිකරුට පාලනය කරගත නොහැකිව මාර්ගයේ පෙරලීයාමෙන් අනතුර සිදුව ඇති බවයි.

මියගොස් ඇත්තේ බකමූණ, මිනිපුරගම ප්‍රදේශයේ පදිංචිව සිටි 26 හැවිරිදි තරුණයෙකි.

අනතුර සම්බන්ධයෙන් බකමූණ පොලීසිය වැඩිදුර විමර්ශන සිදු කරයි.

 

ජනපති හමුවීමට ගිය සජිත් සහ පක්ෂ නායකයින් ආපසු හැරෙයි

පාර්ලිමේන්තු මන්ති‍්‍ර සජිත් පේ‍්‍රමදාස ඇතුළු එක්සත් ජාතික පක්ෂයේ නියෝජිතයින් සහ ජනාධිපතිවරයා අතර අද (17) පැවැත්වීමට නියමිතව තිබූ සාකච්ඡාව කල් ගොස් ඇති බව වාර්තා වෙයි.

පාර්ලිමේන්තු මන්තී‍්‍ර නලින් බණ්ඩාර පැවසුවේ අද පෙරවරුවේ එක්සත් ජාතික පක්ෂ නියෝජිතයින් සාකච්ඡාවක් සඳහා ජනාධිපති කාර්යාලය වෙත ගොස් ඇති බවයි. එහෙත්, ජනාධිපතිවරයා කොළඹින් බැහැරව සිටීම හේතුවෙන් එම නියෝජිතයින් ආපසු හැරී ආ බවයි මන්තී‍්‍රවරයා කියා සිටියේ. බොහෝ දුරට හෙට දිනයේ එම සාකච්ඡාව පැවැත්වෙනු ඇති බවද පාර්ලිමේන්තු මන්තී‍්‍ර නලින් බණ්ඩාර පවසා ඇත්තේ.

 

 

 

සාකච්ඡාවකට පැමිණෙන්නැයි ජනපතිගෙන් TNA පක්ෂයට ආරාධනයක්

සාකච්ඡාවකට පැමිණෙන්නැයි ජනාධිපති මෛත්‍රීපාල සිරිසේන මහතා ද්‍රවිඩ ජාතික සන්ධානයට ආරාධනා කර තිබේ.

විපක්ෂ නායක ආර් සම්බන්ධන් මහතා ඇතුලු පක්ෂයේ පාර්ලිමේන්තු මන්ත්‍රීවරුන්ට හෙට(18) පස්වරු 5 ට එම සාකච්ඡාවට පැමිණෙන ලෙසටයි ජනාධිපතිවරයා ආරධනා කර ඇත්තේ.

මහින්ද රාජපක්ෂ මහතා අග්‍රාමාත්‍යවරයා ලෙස පත්කිරීම සහ පාර්ලිමේන්තුව විසුරුවා හැරීමට ජනාධිපතිවරයා ගත් තීරණයට ද්‍රවිඩ ජාතික සන්ධානය දැඩි විරෝධය පලකල අතර විශ්වාසභංගයටද ද්‍රවිඩ ජාතික සන්ධාන මන්ත්‍රීවරුන් අත්සන් තබා තිබුණි.

 

 

 

අමාත්‍යාංශ 30කට STF ආරක්ෂාව

අමාත්‍යාංශ 30කට තවදුරටත් පොලිස් විශේෂ කාර්යය බලකායේ ආරක්ෂාව යොදවා තිබේ. පොලිස්පතිවරයාගේ උපදෙස් මත පොලිස් විශේෂ කාර්යය බලකායේ අණදෙණ නිලධාරී ජ්‍යෙෂ්ඨ නියෝජ්‍ය පොලිස්පති එම් ආර් ලතීෆ්ගේ ඍජු අධීක්ෂණය යටතේ එම ආරක්ෂක වැඩිපිළිවෙළ කි‍්‍රයාත්මක වෙයි.

අමාත්‍යාංශවලට පොලිස් විශේෂ කාර්යය බලකායේ ආරක්ෂාව යෙදවීමට ඉකුත් දා තීරණය කෙරුණේ පවතින දේශපාලන වාතාවරණය යටතේයි.

 

රිය අනතුරින් බිළිදු ජිවිතයක් සහ කාන්තාවක් ජිවිතක්ෂයට

රත්නපුර, මාරපන ප්‍රදේශයේදී සිදු වු රිය අනතුරින් කාන්තාවක් සහ කුඩා දරුවකු මියගොස් තිබේ.

බස් රථයක් සහ ත්‍රි රෝද රථයක් එකිනෙක ගැටීමෙන් මෙම අනතුර සිදුව ඇති අතර ත්‍රි රෝද රථයේ ගමන් කල 06දෙනෙකු තුවාල ලබා රත්නපුර රෝහලට ඇතුලත් කිරිමෙන් අනතුරුවයි කාන්තාව සහ කුඩා දරුවා මියගොස් ඇත්තේ.

මෙලෙස මියගොස් ඇත්තේ 26 හැවිරිදි මධුෂානි නිරෝෂිකා සහ  අවුරුදු 02යි මාස 09ක් වු සුධිර ප්‍රබුද්ධ යන අය වේ.

අනතුර සම්බන්ධයෙන් බස් රථයේ රියදුරු අත්අඩංගුවට ගෙන ඇති අතර රත්නපුර පොලිසිය වැඩිදුර විමර්ශන පවත්වයි.

 

දුම්රියට පැන සියදිවි හානි කරගනී

කළුතර, නාගස් හංදිය අසල දුම්රිය හරස් මාර්ගයේදී ඊයේ(16)  පුද්ගලයෙකු දුම්රියට පැන සියදිවි හානිකර ගනී.

මෙලෙස සියදිවි හානිකරගෙන ඇත්තේ 69 හැවිරිදි හොරණ ප්‍රදේශයේදී පදිංචිකරුවෙකි.මෘත ශරීරය නාගොඩ රෝහලේ තැන්පත් කර ඇති අතර කළුතර උතුර පොලිසිය වැඩිදුර පරීක්ෂණ පවත්වයි.