යාපනයේ  සිදුකළ පුරාවිද්‍යා කැණීම් වලින් වසර 600ක් පැරණි චීන මැටි බඳුන් හමුවෙයි

යාපනයේ අලෙයිපිඩ්ඩි පළාතේ සිදුකළ පුරාවිද්‍යා කැණීම් වලින් වසර හයසීයකට පෙර චීනයේ නිෂ්පාදිත මැටි බදුන් වල කොටස් හමු වී ඇතැයි එම ප්‍රදේශයේ කැණීම් වලට සහය දක්වන චීන ජාතික පුරා විද්‍යා නිලධාරීන් ප්‍රකාශ කරයි.

යාපනයේ අලෙයිපිඩ්ඩි ප්‍රදේශයේ සිදුකෙරෙන පුරාවිද්‍යා කැණීම් සදහා සහය වීමටත් ඒ පිළිබදව අධ්‍යයනය කිරීමටත් චීනයේ ෂැංහායි විශ්ව විද්‍යාලයේ පුරා විද්‍යා විෂය හදාරන කීප දෙනෙකුම කණ්ඩායම් වශයෙන් යාපනයේ අලෙයිපිඩ්ඩි පළාතට පසුගිය අගෝස්තු මාසයේදී පැමිණ සිටිති.

මේ පිරිස විසින් අලෙයිපිඩ්ඩි ප්‍රදේශයේ වර්ග මීටර් 92,4 ක භූමි ප්‍රදේශයක කරන ලද කැණීම් වලින් චීනයේ නිෂ්පාදිත විවිධ වර්ගයේ මැටි බදුන් වල කැබලි 654 ක් සොයා ගෙන ඇත.  නිෂ්පාදිත එම මැටි බදුන් මේ පළාතට පැමිණි අන්දම පිළිබදව තවදුරටත් කරුණු අධ්‍යයනය කිරීම පිණිස එම මැටි බදුන්වල කොටස් චීනයේ ෂැංහායි විශ්ව විද්‍යාලය වෙත යැවීමට අවශ්‍ය බව කියා සිටියි.

මේ සදහා ශ්‍රී ලංකා රජයේ හා පුරා විද්‍යා දෙපාර්තමෙන්තුවේ සහයක් ලබාගැනීමට බලාපොරොත්තු වන බවද එසේ කිරීමට අසීරු වුවහොත් චීන විශ්ව විද්‍යාලයේ මහාචාර්යවරු පිරිසක් යාපනයට කැදවීමට පියවර ගන්නා බවත් යාපනයේ අලෙයිපිඩ්ඩි පළාතේ කැණීම් වල නිරත චීන ජාතික පුරා විද්‍යා නිලධාරීහු කියා සිටිති.

 

අමාත්‍ය සී.වී.විග්නේස්වරන් මහතාගේ ජන්ම දිනය අද

උතුරු පළාත් ප්‍රධාන අමාත්‍ය සී.වී.විග්නේස්වරන් මහතාගේ උපන් දිනය අද(23)ට යෙදී ඇති අතර උතුරු පළාත් සභාවේ අවසන් සැසිවාරයද යොදා ගෙන තිබුණේ එදිනටය.

සී.වී.විග්නේස්වරන් මහතා සිය ජන්ම දිනය යාපනයේදී සැමරීම සදහා ඊයේ(22) රාත්‍රී යාපනයට පැමිණ සිටියේ ඔහුගේ පුතණුවන් ඇතුළු පවුලේ සාමාජිකයින් සමගය.

ප්‍රධාන අමාත්‍යවරයා හා ඔහුගේ පවුලේ සාමාජිකයින් යාපනයේ සිටින සිය හිතවතුන් හා වැදගත් පුද්ගලයින් හමුවීම සදහාද මේ සංචාරය යොදා ගෙන තිබුණි.

උතුරු පළාත් ප්‍රධාන අමාත්‍යවරයා වශයෙන් ඔහු යාපනයට පැමිණි අවසන් අවස්ථාව මෙය වියහැකි යැයි උතුරේ දේශපාලනඥයෝ කියා සිටිති. කෙසේ වෙතත් මේ මස 24 දා මධ්‍යම රාත්‍රියේදී උතුරු පළාත් සභාව විසුරුවා හැරීමට නියමිතය.

 

අයාලේ යන ගවයින් නිසා රථ වාහන අනතුරු වැඩිවෙයි

මේ දිනවල රාත්‍රී කාලයට මන්නාරම නගරයේ අයාලේ යන ගවයින් නිසා රථ වාහන අනතුරු වැඩි වී ඇතැයි මන්නාරම පොලීසියේ නිලධාරීහු කියා සිටිති.

මද වර්ෂා සහිත කාලගුණයක් පවතින නිසා ගව හිමියන් රාත්‍රී කාලයට ඔවුන්ගේ ගවයින් රැගෙන ගොස් ගාල් නොකිරීම නිසා එම ගවයින් රංචු පිටින් මන්නාරම නගරයේ තැනින් තැන සිටින බව පොලීසිය කියයි.

පොලීසියේ නිලධාරීන් මේ පිළිබදව මන්නාරම ප්‍රාදේශීය සභාවේ සභාපතිවරයා ඇතුළු නිලධාරීන්ව දැනුවත් කළත් මේ දක්වා තත්ත්වය මගහැරී ගොස් නොමැති බව පොලීසිය කියයි.

මන්නාරමේ ගවයින්ගේ අයිතිකරුවෝ දෙමළ වැසියන් වීමත් ප්‍රාදේශීය සභාවේ ඉහල නිලධාරීන්

මුස්ලිම් වීමත් නිසා මේ අයාලේ යන ගවයින්ගේ ප්‍රශ්නය කිසිසේත්ම විසදා ගැනීමට නොහැකි වී ඇති බව මන්නාරමේ තවත් පිරිසක් කියා සිටියහ.

මන්නාරමේ මුස්ලිම් වැසියෝ මන්නාරමේ සිටින ගවයින් බලහත්කාරයෙන් අල්ලා වවුනියාවේ සිටින මස්කඩ හිමියන්ට අලෙවි කරන බවට මන්නාරමේ මුස්ලිම් ජාතිකයින්ට විශාල චෝදනාවක් ඇති බැවින් මුස්ලිම් ජාතිකයෝ මන්නාරමේ ගවයින් සම්බන්ධයෙන් වූ කිසිදු ප්‍රශ්නයකට අත නොතබන බව ඒ පිරිස කියා සිටිති.

මේ සියළුම අර්බුද නිසා එහි අවසන් ප්‍රතිපලය වී ඇත්තේ ගවයින් රංචු පිටින් අයාලේ යමින් මන්නාරම නගරයේ තැනින් තැන සිටීම නිසා විශේෂයෙන්ම යතුරු පැදි කරුවන් මේ ගවයින්ගේ ගැටීමෙන් අනතුරුවලට ලක්වන බව මන්නාරම පොලීසියේ නිලධාරීහු කියා සිටිති.

 

නොර්වුඩ් ප්‍රදේශයේ නායයාමේ අවධානම තවදුරටත්

මධ්‍යම කදුකරයට තව දුරටත් වැසි ඇති විමත් සමග නොර්වුඩ් නිව්වැලි ගම් ප්‍රදේශයේ නායයාම තව දුරටත් සක්‍රිය විමේ අවධානමක් පවතින බව එම ප්‍රදේශයේ ජනතාව පවසති.

මෙම ප්‍රදේශයන්ට ඇද හැලුන අධික වර්ෂාවත් සමග නිව්වැලි ගම ප්‍රදේශයේ සිදුවු නායාමක් හේතුවෙන් එහි මාර්ගයේ කොටසක් සමග නිවාස පහක් කාසල්රි ජලාශයට පතිත විය.

මේ වන විටද මෙම ප්‍රදේශයන්ට ඇද හැලෙන වර්ෂාවත් සමග එම ප්‍රදේශයේ ඉහල කදුවැටිය තව දුරටත් නායයාමකට ලක්විමේ අවධානමක් පවතින බවද එම ප්‍රදේශයේ ජනතාව පවසති.

මෙම කදුවැටියද නාය යාමකට ලක්වුවහොත් මෙම නාය ගිය ස්ථානයේ මාර්ගය සකස් කිරිම තව දුරටත් දුෂ්කර තත්වයකට පත් විය හැකි බවද ඔවුන් වැඩි දුරටත් පවසති.

 

වතුකරයේ ජනතාවට දිවියන්ගෙන් කරදර

වතුකරයේ දිවියන් සැරි සැරිම වැඩි විමත් සමග වතුකරයේ කම්කරු ජනතාව විවිධ දුෂ්කරතාවයන්ට පත්ව ඇත. මේ වන විටත් වතු කරයේ කිප දෙනකුම මෙම දිවියන්ගේ පහර කැම්වලට ලක්ව ඇති අතර වතු කරයේ ස්ථාන කිපයකදිම දිවි පැටවුන්ද හමුව ඇත.

මේ පිලිබදව අදහස් දක්වන වතු කම්කරුවන් පවසනුයේ මෙ වන විට වතුකරය තුල දිවියන්ගේ සැරි සැරිම වැඩි වි ඇති බවත්ය.

වතු කරයේ ස්ථාන කිපයකදිම දිවි පැටවුන්ද හමුවන බවත් එම තත්වයන් මත වතුකරය තුල දිවියන්ගේ වර්ධනය වැඩි වි ඇති බවත් ඔවුන් පවසති.

එමෙන්ම මේ වන විටද වතු කරයේ කිප දෙනකුම දිවියන්ගේ පහාර කැම්වලට ලක්ව ඇති බවත් මෙම තත්වයන් මත වතු කරයේ සේවය කිරිමද දැඩි දුෂ්කර තත්වයකට මෙන්ම අවධානම් තත්වයන්ට පත්ව ඇති බවද පවසති.

මෙම තත්වයන් මත තමනට වතු කරය තුල සේවය කිරිමට දැඩි බියක් පවතින බවත් මේ පිලිබදව වන ජිවි අංශයේ නිලධාරින්ගේ කඩිනම් අවධානය යොමු කල යුතු බවද එම වතු කම්කරුවන් තව දුරටත් පවසන ලදි.

 

ඉහල කොත්මලේ ජලාශයේ වාන් දොරටු ස්වයංක්‍රියව විවෘත වෙයි

මධ්‍යම කදුකරයට පවතින වර්ෂාවත් සමග ඉහල කොත්මලේ ජලාශයේ වාන් දොරටු ස්වයංක්‍රියව විවෘත වි ඇත.

මෙම ප්‍රදේශතුලට මෙම දිනවල පවතින වර්ෂාවත් සමග ඉහල කොත්මලේ ජලාශයේ ජල ධාරිතාව වැඩි විමත් සමග මෙම වාන් දොරටු මෙසේ ස්වයංක්‍රියව විවෘත වී ඇත.

 

 

තායිවාන් දුම්රිය අනතුරින් 18ක් මරුට. 137කට තුවාල

තායිවානයේ යිලාන් ප‍්‍රදේශයේ අද (21)සිදු වූ දුම්රිය අනතුරකින් පුද්ගලයින් 18 දෙනෙකු ජීවිතක්ෂයට පත්ව ඇත. තුවාල ලබා ඇති සංඛ්‍යාව 137ක්. අධිවේගී දුම්රියක් පීලි පැනීමෙන් මෙම අනතුර සිදුව ඇති බවයි විදෙස් මාධ්‍ය වාර්තා කළේ.

ඒ වනවිට එහි ගමන්ගත් මගීන් සංඛ්‍යාව 366ක්. දුම්රියේ සියලූ මැදිරි පීලිපැනීමට ලක්ව ඇති අතර සුන්බුන් අතර සිරවී සිටින පුද්ගලයින් සොයා මෙහෙයුම් සිදු කරන බවයි එරට දුම්රිය බලධාරීන් පැවසුවේ.

 

අපදාවට ලක්වූ නිවාස වෙනුවෙන් ආධාර මුදලක් සහ විකල්ප ඉඩම්

ගාල්ල ප්‍රාදේශිය ලේකම් කොට්ඨාශයේ ගංවතුරෙන් හා නායයාම්වලින් බලපෑම් එල්ලවූ නාගොඩ සහ මාපලගම ප්‍රදේශවල ආපදාවට ලක්වී නිවාස අහිමිවූ සියළු දෙනාටම විකල්ප ඉඩම් ලබාදී නැවත පදංචි කරවීම සම්බන්ධයෙන් සාකච්ඡාවක් ඉඩම් අමාත්‍ය ගයන්ත කරුණාතිලක මහතාගේ ප්‍රධානත්වයෙන් පසුගියදා මාපළගම ප්‍රදේශයේදී පැවැත්විණ.

මෙහිදී අපදාවට ලක්වූ නිවාස වෙනුවෙන් රුපියල් ලක්ෂ 12ක ආධාරමුදලක් සහ විකල්ප ඉඩම් ලබාදීමට රජය කටයුතු කරන බවට අමාත්‍යවරයා ප්‍රකාශ කර සිටියේය.

අතිපූජ්‍ය මහා සංඝරත්නය,හිනිදුම එජාප ප්‍රධාන සන්විධායක සුනිල් සේනානයක මහතා, නාගොඩ ප්‍රදේශිය ලේකම් තුමිය ඇතුළු රජයේ නිළධාරින්, ගොඩනැගිළි පර්යේෂණ ආයතනයේ නිළධාරින් සහ ආපදාවට ලක්වූ පවුල්වල ජනතාව එම අවස්ථාවට එක්වූහ.

විකල්ප ඉඩම් හදුනා ගැනීම වෙනුවෙන් නිරීක්ෂණ චාරිකාවකටද මෙහිදී අමාත්‍යවරයා සහභාගිවිය.

 

 

පහ ශිෂ්‍යත්ව ක්‍රමවේදය වෙනස් කිරීමට කඩිනම් පියවර

පහ වසර ශිෂ්‍යත්ව විභාගය පැවැත්වෙන ක්‍රමවේදය වෙනස් කිරීමට කඩිනමින් කටයුතු කරන බව අධ්‍යාපන අමාත්‍ය අකිල විරාජ් කාරියවසම් මහතා පවසයි.

‘ළඟ ම පාසල හොඳම පාසල’ වැඩසටහන යටතේ කුලියාපිටිය  උඩවෙල රේවත මධ්‍ය මහා විද්‍යාලයේ ඉදි කළ ප්‍රාථමික අධ්‍යාපන සම්පත් මධ්‍යස්ථානය සිසු අයිතියට පත්කිරීමේ අවස්ථාවට එක්වෙමින් අධ්‍යාපන අමාත්‍යවරයා  මේ බව සඳහන් කළා.

ශිෂ්‍යත්ව විභාගය මගින් ශිෂ්‍යත්ව ආධාර ලබා දීමට කටයුතු කරන අතර  ඇතුළත් වීමේ විභාගය යළිත් පැවැත්වීමට කටයුතු කරන බවයි අධ්‍යාපන අමාත්‍ය අකිල විරාජ් කාරියවසම් මහතා එහිදී පෙන්වා දුන්නේ.

එමගින් තරගකාරීත්වය නැති කරන බවත් මේ සම්බන්ධයෙන් සොයා බැලීම සඳහා කමිටුවක් පත් කරන බවත්  අමාත්‍යවරයා මෙහිදී කියා සිටියා.

පාසල් පැවැත්වෙන කාලය තුළ පුද්ගලික පන්ති පැවැත්වීම තහනම් කිරීම සඳහා කැබිනට් පත්‍රිකාවක් ඉදිරියේදී ඉදිරිපත් කරන බව ද අධ්‍යාපන අමාත්‍ය අකිල විරාජ් කාරියවසම් මහතා මෙහිදී සඳහන් කළා.